Skólasöfn í framhaldsskólum

Þjónustukönnun á vegum Samstarfshóps bókasafns- og upplýsingafræðinga í framhaldsskólum

Útdráttur

Samstarfshópur bókasafnsfræðinga í framhaldsskólum (SBF) hefur um árabil unnið að ýmsum sameiginlegum hagsmunamálum bókasafna í framhaldsskólum. Einn liður í því samstarfi var að framkvæma þjónustukönnun um skólasöfn í framhaldsskólum.  Þjónustukönnunin var send til skólameistara í gegnum Skólameistarafélagið. Kveikjan að könnun þessari var sú að bókasafnsþjónusta í framhaldsskólum hefur verið að dragast saman, stöðuhlutfall bókasafns- og upplýsingafræðinga lækkað og jafnvel ekki ráðið í störf þeirra sem hætta. Því var talið brýnt að kanna og kortleggja þá þjónustu sem nemendur framhaldsskólanna fá á sínum skólasöfnum en samkvæmt Lögum um framhaldsskóla nr. 92/2008 skal gera ráð fyrir skólasafni eða tryggja með öðrum hætti aðgang nemenda að þjónustu slíks safns. Þess má geta að í viðmiðum um ytra mat framhaldsskóla er fjallað um skólasöfn og voru niðurstöður könnunarinnar sendar þeim sem starfa að endurskoðun þessara viðmiða.